PAPUADALAMBERITA. KARIKATUR: rusdi anwar
PAPUADALAMBERITA.COM. MANOKWARI – Hari itu Tete gembira sebab dia pu cucu ada lolos jadi PNS di Pemda Papua Barat. Dia pu Cucu su puluhan tahun jadi honorer, mengabdi dan tra putus asa. Tapi itu hari Bapa Gubernur langsung umumkan dan bersyukur dorang bisa juga dapa angkat jadi PNS.
Baca juga: PUTAR PAPEDA: Pace: Korona, Ko Trada yang Blok
Baca juga: PUTAR PAPEDA (2): Mace Mo Bekeng Muka Kinclong, Siooo….!!
“Booo………. hari ini kitorang bekeng acara e……Sebab kamorang su lolos dan nanti su bisa pake baju resmi PNS yang sekarang dong bilang ASN,”Tete rasa bangga skali .Dia pu cucu cuma senyum saja.
“Inga…inga……Tete,sekarang ini masih musim corona,toooo….. tra boleh bekeng sabarang kaseh kumpul orang.Apa lagi kalo bekeng pesta . Inga, jaga jarak aman…….“Nene kaseh inga dan tra lupa pake masker walau cuma dalam rumah saja.
“Yang penting ada , toooo……nanti bekeng makanan bagi ke ipar-ipar dengan tetangga dorang. Yang penting ada,biar cuma telur saja, dia pu ayam menyusul , toooo…………..”kata Tete lalu inga ayam deng telur.
Tapi tra lama Pace Gober ada datang diam-diam langsung dudu di para-para, sambil isap rokok.
Tete bicara sendiri, “Ayam deng telur……ayam deng telur……. mana yang lebeh dolo, ayam kah atau telur.”Tete trasadar pi duduk juga di para-para.
“Eh…Pace sa tra lia ko ada datang. Sobat ada apa apa kah ?
““Sa tadi dengar ko bicara soal telur deng ayam, mana yang lebeh dolo………”Pace buka suara.
”Ya itu…………. sa biasa baku gara deng Nene,mana yang lebeh dolo, telur kah atau ayam….?”sambung Tete serius.
“Pasti ayam, tooooo. Kan ayam yang kaseh keluar telur. Berarti ayam yang lebeh dolo…….”bantah Pace Gober.
“Tapi ayam keluar dari telur, toooooo……. Berarti telur lebeh dolo, heheheh…..’’pendapat Tete Banus tramau kalah.
“Begini. Kebetulan sa ini belajar lama di Jawa. Ini menurut pengetahuan orang Jawa. Telur itu berasal dari kata tellu/telu atau tiga dalam bahasa Indonesia. Na……Satu itu Siji dalam bahasa Jawa dan Loro itu dua. “Kenapa bisa…? “potong Tete.
“Jadi ayam jantan itu Siji, naik di atas ayam betina yang Loro, terjadi hubungan nomor 1 dan 2……akhirnya jadi yang ketiga atau tellu yang akhirnya lahir jadi telu atau telur…….”terangkan Pace Gober deng serius.
“Boooo……………. sobat ko ini bekeng-bekeng saja……Untung sapu anak sa tra kaseh sa nama Telu sebab dong ada di susunan nomor tiga….. Sa di atas nomor satu, lalu nene di bawah sa nomor dua dan terjadi hubungan, lalu lahir yang ketiga atau telu. Boleh juga, ooo…..”Tete senyum-senyum.
“Saya salut deng Bapa Gubernur dorang bisa kaseh lolos 1,283 tenaga honorer jadi PNS ini tahun. Dan sa pu cucu ada iko di dalam.”komentar Tete deng hati berbunga-bunga.
“Sa bisa iko jadi honorer kaaaaah, siapa tau sa bisa juga lolos jadi PNS,”tiba-tiba Pace Angkat suara.
“Hehehe……..Pace, ko pu umur su kadaluarsa. Kalo makanan itu su afker, tra boleh makan lagi. Su karat dia pu kaleng. Itu barang juga mungkin su karat…..”kata Tete sambil tertawa sebab Pace umur su deka PENSIUN kalo jadi pegawai.(rusdi anwar)
