Ilustrasi gambar: PAPUADALAMBERITA: rusdi anwar. PAPUADALAMBERITA.COM. MANOKWARI- Barang apa jadi…..sampe yang dia pu nama Korona bekeng seluruh dunia kaget tra bae. Kenapa…. sebab mulai... PUTAR PAPEDA: Pace: Korona, Ko Trada yang Blok

Ilustrasi gambar: PAPUADALAMBERITA: rusdi anwar.

PAPUADALAMBERITA.COM. MANOKWARI- Barang apa jadi…..sampe yang dia pu nama Korona bekeng seluruh dunia kaget tra bae. Kenapa…. sebab mulai dari rakyat kecil macam Pace Gober, sampeee Amerika pu Presiden jadi terganggu deng itu barang. Kitorang bilang itu “barang” sebab tra bisa lia dia pu rupa. Hanya macam gambar kepala tapi banyak dia pu bintul-bintul.

“Barang itu tra berguna tapi bekeng kitorang sibuk,” komen Pace Gober yg sudah pake masker. “Tra berguna apa…..klo trada Korona  ko pu anak pasti tra bisa belajar dari rumah deng hape. Maitua pasti su jalan dari mall ke mall deng santai,” bantah Tete Banus sambil kunyah pinang pelan-pelan.

“Betul juga, e…. Gara2 si Korona ini pejabat juga su tra bisa jalan ke luar daerah sabarang-sabarang.

Cuma ada satu yg bekeng Pace Gober sedih…..sebab kalo maso rumah sakit tra bisa sabarang lagi.

Rumah sakit terbatas dan dia pu aturan banyak. “Sa ngeri juga o…Dokter deng suster saja bisa lewat kena barang itu,” komen Tete Banus sambil cari dia pu pinang ojek.

“Makanya kitorang yang biasa-biasa ini harus iko aturan yang pemerentah kaseh tau toooo….Ko jang bajalan seenaknya tra pake masker deng jaga jarak,” sambung Pace Gober sambil tongka pinggang.

“Adoooo…..bagemana sa deng Nene klo mau tidur. Tra bisa jaga jarak itu,  yang satu ini tra mau tau….” kipas Tete sambil tertawa.

“Iyaaa……ada juga dia pu  untung. Kalo mace minta wang, langsung bilang ,maaf jaga jarak. Haha…….. ” sambung Pace Gober tra sadar kalo dia pu roko su habis dan dia pu api kena di tangan.

“Itu baru api, belum Korona yang kena di ko pu tangan. Yang jelas kitorang tetap hati-hati deng itu barang halus yg macam hantu saja…Jadi jaga jarak saja dan jang lupa pake Mas Ker di hidung deng mulu. “Masker ! bukan Mas Ker…..” Tutup Tete lalu jalan pi cari kasbi di kebun belakang dia pu rumah.(rusdi anwar)

 PERHATIAN: Nama artikel Putar Papeda adalah kependekan dari kalimat Papua Dalam Berita, Putar Papeda adalah artikel berisikan tulisan humor menggunakan dialek sehari-hari, nama dalam artikel humor bukanlah nama sebenarnya, jika ada kesamaan itu hanya kebetulan dan ilustrasi. Putar Papeda ditayang seminggu sekali setiap HARI SENIN. Semoga terhibur. TERIMA KASIH.(redaksi)

Alamat email Anda tidak akan dipublikasikan. Ruas yang wajib ditandai *