PUTAR PAPEDA (2): Mace Mo Bekeng Muka Kinclong, Siooo….!!

PAPUADALAMBERITA.KARIKATUR: rusdi anwar

PAPUADALAMBERITA.COM. MANOKWARI- Pace Gober baru saja dudu di para-para, tiba-tiba Tete Banus muncul deng batuk tra bae punya. “Uhhuk…uhhuk…….Uhhuuuuuuuuk .!!!”  “Adooooo…… Tete ko ini kenapa. Batuk begitu siapa itu su kena korona,” tegur Pace Gober.

Baca juga: PUTAR PAPEDA: Pace: Korona, Ko Trada yang Blok

Baca juga: BPOM Manokwari dan Ditkrimsus Polda Papua Barat Sita Kosmetik Ilegal Senilai Rp45 Juta, Pelaku Pemain Lama

Tete lalu tarik nafas bae-bae lalu jawab. “ Pace, ko jang bilang begitu. Sa ini cuma batuk biasa saja mooooo….Mungkin kelemarin sa terlalu banyak makan gorengan,” bantah Tete Banus. “Padahal, kalo cuma batuk itu dia pu obat gampang saja……..” kata Pace lagi.

“ Coba apa…………?” Tete langsung maen potong. “ Begini….. ko ambil satu biji rambutan. Ko ikat deng benang itu barang lalu telan. Kalo ko su telan tarik lagi keluar. Sa jamin langsung ko pu batuk iko rambutan pu bulu.

”Tete baru pikir-pikir, Mace langsung keluar ke dorang dua. “ Tete ko jang dengar itu orang gila pu obat. Dia tipu ko saja. Mana bisa rambutan bisa bekeng hilang batuk.” Pace tertawa tra bae sampeee….. batuk juga.

“Nah itu ko juga dapa batuk e……. itu kalo suka tipu orang,” serang Tete.

Tiba-tiba Tete lur bae-bae Mace Gober pu maitua. “ Ada apa ko lia sa begitu rupa,” kata Mace heran-heran.

“Ah, trada sa cuma lia ko pu muka ini, tambah mengkilat, (bagus) kinclong dan mulai jadi putih, cantik,” puji Tete yang memang cakadidi kalo,lia perem yang licin-licin.

“Ada dia pu rahasia toooo……..” Mace senyum-senyum dapa puji dari Tete.

Pace Gober langsung potong. “ Eh Mace, ko jang sabarang pake barang begitu e…….. Kelemarin Balai POM Manokwari dapa sita barang begitu yang illegal. Nanti ko pu muka bisa putih…… kinclong, tapi lama-lama ko pu muka bisa rusak. nanti jadi hitam. Tapi tra apa-apa juga nanti sa cari laen lagi.”

“Bah, biawak se…… baru begitu ko su mau kaseh tinggal sa e……. Sa juga baru tau ini barang. Ada yang kaseh sa coba. “ Mace langsung hapus dia mikeap yang su tiga hari dong pake.

“ Makanya……. ko jang iko-iko deng perem dorang yang tra jelas. Kalo ko su tua tra usa bekeng diri muda…….. Nanti ko rugi saja pake itu barang.” nasehat Pace yahg su baca di papudalamberita.com barang illegal yang BPOM tangkap.

“Ko jang sama deng Tete ini gaya-gaya juga baca iklan di sosmed lalu pesan juga obat kuat. Tapi badan su tra kuat akhirnya bekeng diri susah o…..Tra bisa lagi………….’’ Pace bonglar Tete pu rahasia.

“ He…. ko dapa tau lagi itu barang dari mana.” Tanya Tete heran.

Pace tertawa lalu bilang, “ Nene yag kaseh tau to……….. Nene dapa dia pu botol bekas obat kuat tapi Tete tra bisa lagi……..” Tete pung muka merah tra bae sebab dia pu rahasia Nene ada bongkar.(rusdi anwar)