Ilustrasi gambar. PAPUADALAMBERITA. KARIKATUR: rusdi anwar
PAPUADALAMBERITA.COM.MANOKWARI – Tete Banus itu hari pukul dia pu cucusampe…………..batariak tra bae. Dia puara sampeeee……bisa dengar dari mata jalan yang mau masuk ke Tete pu rumah. Pas begitu Pace Gober ada jalan mau ke Tete pu rumah.
“Tete, kenapa ko pukul ko pu cucu macam begitu. Macam ko emosi bagemana ini….”tegur Pace Gober.
“Ah biaasa saja……….sa latih dorang….”jawab Tetet deng santai.
“Latih bagemana sampe ko pu cucu itu itu batariak kesakitan,”bantah Pace lagi sambil kaseh lepas itu anak dari Tete pu tangan.
“Begini………Sebenarnya ini anak ada dia pu bakat jadi petinju. Jadi sa latih dorang supaya nanti tahan pukul. Makanya tiap pagi sa pukul……Nanti dong bisa juara, toooooo……….”terangkan Tete Banus bekeng Pace kaget tra bae punya.
“Itu tra betul Tete.Ko serahkan saja itu anak ke pelatih tinju yang memang su tau dia pu cara latihan toooo……. Bukan ko yang bekeng latihan sendiri dan tra maso akal……”
Dorang dua lalu duduk nonton televisi.Tapi di atas meja Nenesu ada taroh dua piringpapeda yang masih panas lengkap deng ikan kuah kuning. Tra lupa bunga papaya. Dorang dua lalu sikat itu barang yang memang bekeng poro lapar tra bae punya.
Selesai makan Tete stel dia pu televisi , tapi berita semua sama saja. Demo-demo dan Pace suruh kaseh pindah dia pu acara . “Ko cari sinetron ka…………sa su bosan deng yang begitu…”protes Pace Gober.“Memang begitu sudah, tooooooo………………..”tambah Pace.
Memang Pace Gober sampeeee……emosi lia acara televise minggu kelemarin.Ada berapa hari itu dia pu berita lebeh banyak demo-demo saja. Sampe ada yang korban. Dorang yang demo dan petugas yang amankan demo macam polisi dorang juga ada yang korban.Coba dorang biacara bae-bae,kaaaa……….. supaya Dewan deng Pemerintah bisa dengar. Dewan deng Pemerintah juga seharusnya terima dorang dan bicara bae-bae supaya dong jangan demo begitu.
“Yang kasean ini rakyat kecil macam kitorang yang jadikorban.Tra bisa jualan, karena dong tutup jalan, tra bisa tenang sebab lia dorang rebut,”Nene ada kaseh suara.
“Yoooooo…………….. belum lagi dong kaseh hancur-hancur terminal, kantor…………….Sa lia di Jakarta itu, boooooo……………….ada banyak terminal busyang su hancur, ”tambah Tete.
“Yang sa heran juga, banyak anak SMA yang iko demo padahal dorang belum tau apa-apa. Dan yang bahaya, banyak yangtra pake masker atau jaga jarak iko demo.”Pace inga yang dong lia kelemarin.
“Tapi kasean juga e………itu anak sekolah dong tangkap kaaaah……Padahal diapu orang tua juga tra tau anak pi mana.”Nene iko sumbang suara.
“Makanya anak sekolah itu , suruh dia pu orang tua jemput to……….Supaya tau kalo dia pu anak anak iko dia pu kakak-kakak mahasiswa deng buruh pi demo, bukan pi belajar. Tapi….. demo itu juga ada dia guna juga supaya Pemerentah dong perhatikan rakyat kecil pu keluhan……”Pace tambah.
“Itu sudah…….yang penting kitorang di Papua Barat ini amandan terkendali. Supaya kitorang tenang cari wang, tenang kerja dan trada tambah deng virus…………………”sambung Tete tra lupa tambah kuah ikan kuning dan sikat bae-bae papeda yang su mulai dingin.(rusdi anwar)
