Ilustrasi gambar. PAPUADALAMBERITA. KARIKATUR: rusdi anwar
PAPUADALAMBERITA.COM. MANOKWARI – Pake masker juga itu ada dia pu cara. Tra bisa asal pake masker saja. Atau sabarang dong bekeng jadi masker. Tapi itu hari Tete Banus memang tra tau dan karena tra lia bae-bae akhirnya salah pake masker.Nene ada suruh Tete pi pasar beli sagu satu tumang.Tapi dong suruh cari sagu itu di pasar dan pasar su mau tutup. Jadi Tete cepat-cepat mau berangkat. Dia pu baju kaos saja sampe tabale, apa lagi ada dia pu tulisan CINTA MATI.
Baca juga: PUTAR PAPEDA 7 : Yang Dong Jual Bukan Itu
Tete kaseh maso dia pu masker di saku celana, sebab tra sempat pake lagi. Dong jalan cepat dan juga su tra pake sandal sebab sandal yang sebelah anjing ada bawa lari. Tra tau kemana.
Begitu deka pasar, eh ternyata ada sweping masker. Yang tra pake masker dong suruh pushup atau denda. Tete tra bisa lagi push up apalagi denda. Dia pu wang denda bisa beli pinang dua kali.
Tete inga tadi ada kaseh maso di saku dia pu masker. Deng jalan cepat Tete tarik dia pu masker dari saku lalu pasang di dia pu muka. Dan tra perhatikan lagi itu masker kah apa……Yang penting bisa tutup hidung deng mulut.
Waktu pas di depan petugas, Tete heran sebab petugas dong tertawa. Apa lagi ada petugas perem yang dia pu tertawa kencang macam kuntilanak.
“Kenapa ko tertawa…..ada apa kah ? Ko senang deng sa pu masker kah ?” tanya Tetepenasaran.
“Maaf Tete…..Coba periksa Tete pu masker itu,”kata petugas lagi sambil terus tertawa.
Tete langsung tarik dia pu masker dan begitu lihat , “Bioksna …….! Ini Nene pu celana. Ada rabik lagi. Booooo…..Ada harus dong tertawa sa,” maki Tete.
Tadi waktu Tete mau berangkat Tete tra lia Nene pu celana yang tagantung di dinding dong tarik saja dan kaseh maso dalam sak. Pengalaman.
Memang sekarang kalo mau keluar harus periksa dolo, apa su bawa masker kah trada…..Tapi nga—inga jang salah bawa e……..hehehe……
Gubernur Papua Barat saja sangat perhatian deng masker. Kelemarin itu Bapa Gubernur pi bagi-bagi masker di jalan. Paitua bagi-bagi ke masyarakat. Itu yang dong bilang Gerakan Halo Masker.
Jadi ini dia pu masalah su berbahaya, kitorang semua wajib pake masker kalo keluar rumah. Gubernur juga ada pesan suruh makan makanan bergizi.
Supaya badan sehat dan tra gampang kena penyakit. Orang tua yang macam Tete ini yang dong bilang LANSIA harus jaga bae-bae sebab gampang kena penyakit.
Jang sabarang keluar apalagi lur-lur perem. Dari itu Tete deng Pace Gober tra bisa lagi santai malam-malam minum kopi di warung. Mace deng Nene yang harus siap bekeng kopi malam. Enak juga too….. tra keluar doi.
“Kalo di tampa tidur,harus pake masker juga kah…? “tiba—tiba Mace tanya itu ke Pace Gober.
“Oo…..sa yang harus masker, mace,”jawab Pace.
“Bah,di tampa tidur trada corona too……ko bisa hosa kalo pake masker di tampa tidur. ”Potong Mace deng serius.
“Yoooo….. sa harus pake masker buat tutup hidup. Sebab ko pu virus dari ketiak itu…. luar biasa,”kata Pace sambil tertawa.
Mace langsung hantam Pace Gober deng bantal . Tapi dong hantam mesra…tra pake emosi apa lagi emoti…….(rusdi anwar).
