PAPUADALAMBERITA. CARIKATUR: rusdi anwar
PAPUADALAMBERITA. COM. MANOKWARI – Tete Banus pu sepatu su tertawa alias su rusak. Kalo dong pake itu sepatu depu ujung kaki keluar. Sebab itu Tete rencana mobeli sepatu baru.
Baca juga: PUTAR PAPEDA 5: Berguna Kalo Su Picah
Tete lalu ambil kertas deng pensil lalu ukur depu kaki di kertas. Tete lalu ke toko nae ojek siang-siang.
Sampe di Toko Sepatu ternyata depu ukuran kaki tadi lupa di rumah. Dong kaseh tinggal di atas kursi. Tete lalu pulang lagi deng ojek ke rumah ambil de pu ukuran kaki dan balik lagi ke toko, tapi nae angkot.
Sampeee……..di toko sepatu, depu toko su tutup. Istirahat siang.Tete lalu pulang deng kecewa berat…berat. Tra lama Pace Gober ada datang deng sepatu baru mengkilat karena dong baru semer.
“Tete kenapa ko macam cape deng kecewa begitu,”tegur Pace Gober sambil kas tunjuk depu sepatu.
“Tadi sa mo pi di toko beli sepatu, tapi depu ukuran sa lupa bawa. Jadi…sa pulang lagi ke rumah ambil depu ukuran. Tapi sampe di toko lagi, awinoooooo…..depu toko su tutup,” terangkan Tete lengkap.
Pace tertawa keras dengar Tete pu perjuangan mo beli sepatu.
“Tete, tete……………. kenapa ko bekeng susah diri. Ko pu kaki ko ada bawa, toooo……ya, langsung saja ko ukur ko pu kaki deng sepatu yang ada di situ…….kenapa harus pulang lagi. Dasar memang ko su tua………”
“Tapi sa lebeh percaya deng ukuran,’kata Tete deng tenang.
Dengar begitu Pace Gober tra bisa jawab. Pace lap lagi de pu sepatu dengan kos kaki sebelah yang memang dong bawadari rumah. Itu hari Pace baru pulang dari acara perkawinan, jadi lengkap kemeja deng sepatu.
“Lalu siapa yang kawin, “potong Tete Banus.
“Boooooo…………. ini banyak. Kalo tra salah ada 22 pasang yang kawin. Dan yang kawin itu bukan orang biasa,”terangkan Pace.
“Hantu ka apa, kawin deng perempuan 22 orang,”Tete jadi heran dengar.
“Bah, Ko dengar dolo….. sa bilang yang kawin itu 22 pasang. Bukan 22 perem kawin deng satu laki-laki. Itu acara kawin massal polisi dorang dan ada 22 pasang. Ini baru terjadi o…….”
“Sa juga mau kalo begitu,”potong Tete tiba-tiba.
Nene ada muncul deng bawa parang dari dalam rumah, “Coba kalo ko berani. Sa bekeng ko jadi ikan asar…..” Pace tertawa lia Tete dapa kejar deng parang.
“Sa pu maksud bukan begitu………………..Sa Cuma maen-maen saja, “kata Tete kaget tra bae dan tra tau kalo tadi Nene ada dengar semua dia pu cerita.
Memang di lingkungan Polda Papua Barat dong ada acara nikah massal. Ini dong bekeng secara serentak. Tapi acara ini kitorang tra bisa lia bea-bae muka yang nikah.
“Kenapa bisa….? “tanya Nene yang suka cari cerita.
“Sebab………semua yang nikah pake masker too…………. Ingat ini bukan gossip yang biasa nene bekeng,” kata Pace Gober.
“Sa tau itu betul. Pace ko tau Gosip itu apa kah…?, Nene bale tanya.
“Cerita yang tra betul toooo….”jawab Pace. “Hehehe…..Gossip itu makin digosok makin siiip……….”tutup Nene sambil tertawa.(rusdi anwar)
