PAPUADALAMBERITA. KARIKATUR: rusdi anwar
PAPUADALAMBERITA.COM. MANOKWARI – Pace Goberpu anak laki-laki satu su sekolah di SD. Tapi itu anak dia pu pertanyaan banyak sampe Pace kadang-kadang tra bisa jawab. Yapet ini dia pu nama biasa bekeng pusing Pace kalo baru pulang sekolah. Pasti dong tanya lagi kalo tra puas deng Bapa Guru pu jawaban.
Itu hari Yapet pulang cepat dan langsung tanya Pace Gober yang ada duduk di para-para kaseh bae dia pu jaring.
“Bapa…sa mau tanya halini. Tadi Bapa Guru tra sempat jawab sebab kitorang su mau pulang,”kata Yapet deng serius.
“Ko mau tanya apa lagi. ………….. Kenapa ko tra tanya tadi sekolah kaah?”kata Pace.”
“Guru belum sempat jawab kitorang su pulang. Ini sa pu pertanyaan, kenapa kalo dekter operasi orang, dia muka selalu tutup setengah macam pake masker.”Yapet su mulai.
“Bah, macam begitu saja ko mau tanya…….. Dorang itu pake masker supaya tra kena virus tooooo…………………..”jawab Pace deng serius.
“Bah, salah…..Itu dokter tutup dia pu muka deng masker, supaya ……kalo salah operasi dong tra kenal siapa dokter yang operasi dorang……”kata Yapet sambil tertawa.
“Dasar……….Itu tra betul, Cuma cerita saja. !”maki Pace lalu lanjut dia pu kerja kaseh bae jarring yang dong mau peke cari ikan.
Jadi dari dolo yang pake masker itu memang dokter. Kitorang juga biasa pake masker kalo banyak debu atau nae motor. Tapi sekarang di mana-mana kitorang bisa lia manusia su banyak pake masker. Malah sekarang kalo ko tra pake masker, ko dapa tangkap dan denda.Ini gara-gara Corona di Manokwari maseh tinggi jadi harus tetap pake masker, jaga jarak dan cuci tangan.
Tiba-tiba Tete Banus datang deng hosa-hosa……. sambil batuk-batuk dan bawa dia pu hp. mau kaseh tunjuk Pace Gober.
“Tete ko stop di situ…..jangan-jangan ko ini kena Koronpu nene,”kata Pace Gober lalu pasang dia pu masker deng cepat.
“Boooooo…………….. trada,sobat.Jang ko menuduh cepat begitu deng kejam. Sa cuma pilek biasa. Ini gara-gara kelemarin sa pi molo tertalalu lama cari ikan,”kata Tete.
“Yooo……….. kitorang harus hati-hati,too….. sekarang banyak yang meninggal gara-gara Corona.”
“Ini….. ini yang salah. Ada pasien yang meninggal dong bilang Covid. Semua pasien yang meninggal dong pasti tuduh Covid. Ini yang bekeng Muldoko itu Kepala Staf Presiden ada bicara keras.”Terangkan Tete yang baru baca dia pu berita di hape.
“Bah….. masa bisa begitu. Ko karang saja ini,”potong Pace tra percaya.
“Adooooo……………ini berita yang betul. Muldoko bilang itu ada Rumah Sakit yang tipu-tipu saja supaya dapat bantuan dari pemerintah. Jadi setiap yang meninggal dong bilang Covid supaya dong dapa anggaran dari pemerintah , toooo…….”terangkan Tete deng emosi.
“Tapi Tete, tra semua rumah sakit begitu too………………Kitorang di Papua Barat maseh jujur tooooo………”Pace tra mau kalah.
“Tra tau e……sebab sa cuma baca saja……Dari itu supaya tra kena deng Covid kitorang harus kaseh sehat kitorang pu diri. Makan yang ada dia pu gizi, minum vitamin, kalo perlu jemur badan. Jang cumakasur yang ko jemurdi matahari……..”nasehat Tete Banus.(rusdi anwar)
